REFLEKSAUN BA MISA NIAN

Dala bala barak ita ida-idak hakarak sente moris iha Lalehan. Tanba klaru katak pasti iha nebaa ita sei sente hakslolok hela deit ho Maromak, problema la iha no buat hotu-hotu diak deit.

Maibee ita dala barak la bele realiza ka la hetan moris ida nee iha mundu, loos ka lae? Afinal Maromak haraik tiha moris Lalehan nian iha mundu. Fiar ka lae?

Hakarak sente moris iha lalehan nee ita bele sente liu husi selebrasaun Eukaristia Santa, Misa santa, hanesan Domingo-Domingo ita mai misa hodi iha nebaa ita selebra ita nia fiar ba Maromak no ita hamutuk ho Maromak liu husi Jesus Kristu nia isin no ran. Maibee dala barak ita seidauk kumpriende. Tanba saa mak dehan Selebrasaun Eukaristia santa nee hanesan ita iha lalehan? Tanba iha momentu nee Jesus Kristu rasik hola parte ou marka Nia prezensa liu husi Nia Isin no Nia Raan rasik, nee misteriu ida. Wainhira Nia mai iha Eukaristia ida nee Nia hakarak hela iha ita, Nia hakarak hamutuk ho ita liu husi komungga.

1. Tanba nee maluk sira, hau nia inan aman sira, kolega sira, wainhira ita ba missa ita persiza prepara an didak ba selebrasaun Eukaristia Santa.

2. Eukaristia Santa hanesan ita nia huun kura nian, huun kbiit no hetan poder iha tempu nebee ita hola parte iha sakramentu ida nee.

3. Mai ita hotu husik ita nia an tomak (problema, terus, susar, moras etc) atu esperensia Jesus nia prezensa iha ita nia moris.

4. Maun alin sira, hau konvida ita boot sira atu hateke ba Jesus nia oin nebee marka prezensa ho ita liu husi Nia Isin no Raan. Husik no hamamar ita boot nia laran atu iha tempu kmanek ida nee Nia lao tama ba ita boot nia laran no hamutuk ho ita boot sai ida deit iha fatin ida nee. Nia rasik dehan “ema nebee haan hau nia isin no hemu hau nia raan sei moris ba nafatin” Jon 6:54, 56

5. Simu Nia kura ba. (Nia hakarak kura ita boot).

6. Simu Nia hakuak ba. (Nia hakarak hakuak ita boot).

7. Rona Nia, no hatete ba Nia dehan Nia domin ba ita boot nee boot oinsaa / dala hira ona mak Nia la koalia hamutuk ho ita boot.

8. Saida mak ita boot nia laran hakarak husi Nia, hatete sai ba Nia.

Obrigadu barak no HAHI BA NAI !

Abetu