Hau nia naran Aleixo do Rosario Pereira, hela iha Comoro, Pantai Kelapa. Husi distritu Baucau sub-distritu Laga, Escola iha UNTL (FUP). Tama iha Klosan ba Kristu iha 21 Outubru 2006. Agora dadaun serbi hanesan Missionary KBK nian nudar Xefe Apostoladu Familia ba Kaben na’in ba Kristu Timor-Leste.
Klosan ba Kristu mak kondisaun ida nebee hau bele buras iha fiar no halo hau rekuinyese hau nia an liu tan, liu-liu hau nia moris nebe bele hetan ksolok no los wainhira hau involve an iha komunidade ida nee.
Nudar Klosan ba Kristu, oras nee dau-daun, hau serbi nudar Xefe Apostoladu Familia nian, nebee kaer Labarik ba Kristu, Joven ba Kristu, no Klosan ba Kristu. Hau sente kontente ho knar ida nee tanba hau fiar katak Maromak tau hau duni iha komunidade ida nee atu halao nia misaun ida nee, hodi serbi Nia nafatin maske hetan difikuldade barak maibee hau la sente mesak, Maromak foo dalan nafatin mai hau atu halao knar ida ne.
Klosan ba Kristu mai hau mak furak no uniku liu iha kondisaun ida nebee, hau bele hetan ksolok tanba dala barak hau hetan duvida ba hau nia moris aban bairua nian. Maibe liu husi komunidade ida nee, hau bele hetan inspirasaun nebee forte liu no halo hau sussesu iha buat hotu, espesial liu iha hau nia estudu nebee hau rasik duvida ba ida nee. Saatan hau laduun foo hau nia tempu ba hau nia eskola hanesan tugas ruma, liu-liu hau nia teze. Maibee ho hau nia serbi nebee ho laran, hau hetan grasa boot, hau bele ezame eskripsi ho valor nebe hau rasik la hein katak hetan valor diak tanba hau la merese. Inspirasaun nebee hau hetan husi komunidade ida nee mak: “serbi deit tanba Maromak sei kompleta buat hotu nebee ita falta iha ita nia moris no iha ita nia familia”.
Loos duni katak Maromak la haluha duni, no Nia foo prezente espesial duni ba ida nebee serbi ho laran. Dala barak, hau serbi Nia kleur tiha ona maibee hau sei duvida nunka laran metin ba Nia liafuan sira nee, maibe wainhira hau sente liu Maromak nia domin no nia grasa, hau sente hau moe los tanba dala barak hau duvida. Maibee Maromak foo no harahun duni hau nia tauk no duvida. Versiku nebe hau nunka haluha iha hau nia moris no hau hili sai hau nia motto mak “ Jesus dehan keta tauk hau sei hamutuk ho too mundu nia rohan”. Loos duni katak dala barak hau sente dehan hau mesak, tan nee hau nia duvida sira mos barak. Ida nee halo hau hetan korajen maka’as liu tan no hau nia duvida no tauk sira nee lakon. Hau sente katak hau nunka mesak, iha momentu nebee hau sente tauk no duvida, hau sente katak Maromak besik liu hau, iha situasaun nebee difisil.
Ikus mai, tan Maromak nia domin, hau hetan grasa barak espesial liu mak hau bele hetan dosen nebee diak. Nia orienta hau nia eskripsi lao ho diak la halo hau ulun moras, no ikus mai hau nia ezame eskripsi lao ho susesu maske hau nia teze nee hau rasik nunka fokus liu. Nee halo hau hakfodak tanba hetan valor nebe diak.
Hahi ba Na’i !!!
“ Maromak diak!! ....Nafatin"!!
“ Eu Estarei Comvosco todos os dias ate ao fin do mundo”
(Mat 28:20).
No comments:
Post a Comment