MAROMAK MAK NAROMAN

Edisaun 5: Segunda, 31 Janeiru 2011

 [1João 1:5-10]

5 Lia menon nebe ami rona housi Nia, no haklaken ba imi mak ne’e: Maromak mak naroman, la iha nakukun iha Nia.

6 Ne’e duni, ita dehan karik katak ita iha domin iha nia, maibe ita hela iha nakukun laran, ita bosok no ita la moris tuir lialos.

7 Maibe ita moris karik iha naroman, nudar Nia iha naroman, ne’e katak ita iha domin ho maluk sira no, Jesus, nia Oan, nia ran hamos ita housi sala.

8 Ita dehan karik katak ita sala la iha, ita lohi ita an rasik; la iha lialos iha ita.

9 Maibe ita simu an karik nudar ema maksalak iha Maromak futar oin, Nia sei halo tuir nia promessa hodi halo buat nebe los; Nia sei kasu ita nia sala no hamos ita nia hahalok aat hotu.

10 Ita dehan karik katak ita la sala ida, ita halo Maromak sai bosokten, no nia liafuan la hela iha ita.

Reflesaun badak ba ita hotu.

Dala ruma ita boot sira rona ona konaba liafuan ida dehan Kristaun KTP, loos ka lae? Liafuan Kristaun KTP nee ema barak kumpriende katak ema nee Kristaun duni maibee nia hahalok la tuir buat nebee Kristaun nia hanorin. Husi liafuan KTP mos ita bele kompriende hanesan tuir mai nee:

KTP = Kristen Tanpa Pertobatan (Kristaun la ho arepende/hakribit sala)

KTP = Kristen Tanpa Pertumbuhan. (Kristaun la ho fiar nebee buras)

KTP = Kristen Tanpa Pelayanan. (Kristaun la ho serbi)

Se ita haree fali Maromak nia liafuan ohin iha leten, ita bele hetan tan siknifikadu foun konaba kristaun KTP = ”Kristen Tanba Persekutuan”- melalui doa- (Kristaun nebee la kohi moris hamutuk).

Atu moris hamutuk ho see? Moris hamutuk ho Maromak liu husi orasaun no serbi. Siknifika katak, maski ema nee baa misa hela deit, serbi Maromak, maibee nia la iha relasaun diak ho Maromak. Entaun nia atividade serbi sira nee mos sai maran ka mamuk. Hanesan mos robot nebee book an ba mai maibee la iha klamar nebee moris. Saun João hatete katak se ema la iha relasaun diak ho Maromak nee siknifika katak ema nee sei sai atan ba sala no moris iha nakukun.

Maski nia ba misa bei-beik, maibee iha nia moris tomak la kohi hatudu nia identidade nudar ema Kristaun nebee loloos, no dala ruma mos halo hahalok nebee la tuir Maromak nia hakarak.

Entaun belun  sira, mai ita halo evaluasaun ba ita nia an loron-loron. Lalika halo ita nia an nee sai ema Kristaun KTP. Ita tenki matan moris neon nain hodi fila lalais ba Maromak hodi harii relasaun pesoal ho Nia liu husi ita nia tempu orasaun.

EMA NEBEE MORIS IHA NAROMAN SEI LA GOSTA MORIS IHA NAKUKUN

Pergunta ba ita atu reflete:

1. Siada mak ita boot nia hanoin konaba moris iha naroman no iha nakukun.

2. Ita boot lori ona naroman ba ema seluk ka seidauk? Liu husi aspeitu saida?

3. Oinsaa ho ita boot nia tempu orasaun agora dadauk?

Abetu