"EMA KRISTAUN NEBEE LOOS" [17 Janeiru 2011]

Edisaun: 2



Karik ita hanoin katak ema Kristaun loloos mak ema nebee reza no baa misa bei-beik ?

Ou karik ita mos hanoin katak ema Kristaun loloos mak ema nebee badinas atu servi ?

Entaun ema Kristaun loloos mak oinsaa ?

Nee ita bele aprende liu husi Saun Paulo nia surat ba sarani sira iha Roma 1:1

1. Hatudu duni nia identidade nudar Kristaun.


Ema kristaun loloos mak berani atu hatudu nia identidade nudar Kristu nia atan. Ita haree Saun Paulo hahuu nia surat ba sarani sira iha Roma hodi hatudu nia an nudar Jesus nia atan, nebee Jesus mak bolu nia atu sai apostulu. Atan katak ema folin laek (budak), ema nebee servisu ba nia patraun. No apostulu katak refere ba Jesús nia apostulu 12 nee.

Saun Paulu deklara nia an nudar Kristu nia atan no mos nudar Jesus nia apostulu. Ho nunee, Saun Paulo hatete katak nia hakarak halo tuir nia patraun nia hakarak ka Kristu nia hakarak, laos halo tuir fali nia hakarak rasik. Tan nee, liu husi hakribi salan nebee nia halo, Saun Paulo hakarak prova katak nia apostulu ba Jesus.

2. Moris Santu.

Nudar ema kristaun nebee loloos persiza moris moos no loos (santu). Saun Paulo hatete katak Maromak halo nia sai santu ona. Katak nia nebee ema sala nain Maromak salva ona nia. Maromak hasantu Saun Paulo liu husi nia moris loron-loron hodi moris santu.


3. Iha objetivu moris.


Nudar ema Kristaun loloos mak tenki iha objetivu moris. Nee mak atu fo glorai ba Maromak liu husi aspeitu moris hotu-hotu. Saun Paulo deklara katak servisu nebee nia halo nee sai nudar nia objetivu moris. Servisu nebee nia halo mak haklaken Maromak nia Evanjelyu iha fatin nebee deit.

Tan nee hau konvida ita hotu atu husu Maromak nia kbiit hodi ita mos bele iha atan berani hatudu ita nia identidade nudar Jesus nia atan no eskolante diak, moris santu, nakonu ho integridade no bele fo Gloria ba Maromak liu husi aspeitu moris hotu-hotu, liu-liu atu sai Maromak nia instrumentu hodi haklaken nia Evanjelyu.

Obrigadu barak ...

Husi:

Abetu

Klosan ba Kristu