Logo KBK 2013

Logo KBK 2013

Thursday, March 10, 2011

TEMPU KOAREZMA

Edisaun: 7


Tempu koarezma nee katak tempu ida nebee atu hamos ita nia klamar. Tamba dala ruma ita nia kalamar hasoru buat aat hodi halo ita nia klamar sente maran no hamrook ba Maromak, tan nee ita sente hanesan dook husi Maromak. Tempu koarezma ida nee sei ajuda ita atu muda ita nia klamar nebee hamrook ba Maromak hakbesik fali ba Maromak hodi la hamrook tan. Tempu ida nee mos ita pesiza muda ita nia hahalok bai-bain sira nebee aat, hanesan hanoin deit ita nia-an (egois), gosta atu hirus no sel-seluk tan, hodi muda sira ba diak.
 Tinan tinan bai-bain ema barak tuir retiru. Retiru hanesan atu halo ita nia klamar fresku fila fali ka moos fila fali. Tanba liu husi retiru ita bele hasai todan lor-loron nian nebee ita iha. Objetivu husi retiru nee atu ita bele foo tempu hodi bele sente no rona Maromak. Ita bele dehan tempu koarezma nee hanesan tempu Retiru boot(Retret Agung) durante loron 40 nia laran. Nee ita bele duni sai buat aat hot-hotu hanesan ita nia laran foer no tauk sira, hodi nunee ita bele fokus ita nia-an ka hanoin deit ba Maromak no mos ita nia maluk sira, nunee ita nia relasaun bele sai metin liu tan ba Maromak no ho ita nia maluk sira. Maneira seluk nebe ita bele uza maka ho oinsaa ita bele hatene ema seluk nebee harii sira nia relasaun diak ho Maromak iha tempu kotuk.

Ikus liu, iha deit liafuan rua atu fo konkluzaun katak saida mak tempu prapaskua, katak: “HAKARAK” no “ESFORSU-AN”. Hanesan kuandu ita iha hakarak atu hadomi ita nia maluk, ita mos tenki hakarak atu la bele halo sira nia laran moras. Razaun ida tanbasaa ita la konsege (gagal) halo ita nia hakarak nee hodi hadomi ita nia maluk, nee tanba ita la “esforsu-an”. Biblia hatete katak “espiritu halo tuir deit (roh memang penurut), maibee isin nee fraku”.

Iha nee mak ita nia knaar iha tempu koarezma nian, katak hadia ita nia hahalok diak sai forte. Ita esforsu atu domina ita nia-an no ita nia hanoin hanesan buat kik-kik sira nee. Ita persiza jenjun ba buat nebee ita bai-bain gosta atu halo purezemplu; hamenus han repsadu, nonton televizaun, sigaru, tua no buat sel-seluk tan. Se ita bele domina ita nia-an iha buat kiik-kiik sira hanesan ohin hau temi nee, diak liu ita kontinua nafatin domina ita nia-an ba oin nafatin ho seriu.
Koko atu domina-an uluk, nee la too deit atu hamenus hahalok aat kiik sira nee, maibee ita mos persiza hahuu halo buat diak foun hodi troka hahalok aat sira nee. Hanesan lee Biblia loron-loron, reza Tersu, simu Komunyaun tuir nia dalan. Tan nee laos atu tuur nonok deit, maibee HALO NETIK BUAT RUMA. Hahuu husi loron Kuarta feira Sinjas hodi simu rai uut nebee hetan bensaun ona depois tenki hahuu fo moris foun ba o nia klamar.

TANBA SAIDA MAK TEMPU KOAREZMA NEE HALO DURANTE LORON 40 NIA LARAN ?

Uluk na-nain loron 40 ba ita atu hakribi ita nia sala, nee ita sura hahuu husi loron Sabadu lokraik antes loron Domingu primeiru I koarezma nian too Kinta feira Santa wainhira Jesus han ba dala ikus ho Nia apostulu sira; depois ida nee mak tama ba Misteriu Paskoa nian.

Tempu koarezma fahe ba rua. Primeiru, ita sura loron haat husi Kuarta feira Sinjas too Domingo primeiru 1 koarezma nian. Sigundu, loron 36 depois de too loron Domingo Ramos. Tempu koarezma sigundu 2 nee refleta liu-liu kona ba Jesus Nia Terus. Loron 40 nee hatudu katak uluk povu Israel sira sai husi Ejiptiu lao durante tinan 40 nia laran iha rai fuik maran (padang gurun). Siknifika husi loron 40 nee ita mos persija hare tuir Moises no Elia, Moises koalia ho Maromak iha foho Sinai no Elia koalia ho Maromak iha foho Horeb, depois de sira hamoos sira nia-an liu husi jenjun durante loron 40 (Ex /Keluaran 24:18, I Liurai/ I Raja-Raja 19:8

Jesus Kristu mos halo nunee, antes Nia hatudu-An atu hanorin, Nia mos simu babtismu no halo jenjun durante loron 40 iha padang gurun depois mak Nia sai hanorin iha fatin publiku. Iha momentu nebaa loos duni katak diabu koko Nia dala tolu. Tentasaun ba dala uluk maka diabu halo Nia hamlaha. Ita mos sei nunee, diabu sei uza maneira hamlaha ida nee atu halo ita la bele jenjun tanba ita atu halo tuir deit ita nia isin nia hakarak. Iha tentasaun ba dala rua nian nebee Jesus hasoru maka diabu koko Nia hadi haruka Nia atu hamonu Nia-An tanba Anju sira iha lalehan sei mai simu atu Nia la bele monu kona rai. Diabu sei koko ita hodi halo ita foti-an, ita tenki hatene katak buat ida foti-an nee kontra tebes ita nia orasaun, meditasaun no kontra Maromak Nia hakarak.
Tentasaun ba dala tolu nebee Jesus hasoru maka diabu promete Jesus se Nia adora diabu karik diabu sei fo riku no ukun iha mundu tomak. Diabu koko ita ho ita nia hakarak atu ita buka halibur riku soin iha mundu, ita mos hatene katak Maromak hakarak ita atu laran diak hodi tulun maluk sira seluk.

Durante tempu prapaskua ita persiza moris iha naroman nudar Maromak Nia oan, tanba naroman maka sei foo fuan hahalok diak, justisa no lia loos. (efesu 5:8-9).

Obrigadu barak no hahi ba Nai!

Husi Abetu
Klosan ba Kristu